ନୂଆଦିଲ୍ଲୀ ୨୭।୦୩; ଟିମ୍ ଇଣ୍ଡିଆକୁ ଆଇସିସି ଚାମ୍ପିଅନ୍ସ ଟ୍ରଫିରେ ଚାମ୍ପିଅନ୍ କରାଇବା ପରେ ମୁଖ୍ୟ କୋଚ୍ ଗୌତମ ଗମ୍ଭୀର ଫ୍ରାନ୍ସରେ ଛୁଟି କାଟୁଛନ୍ତି। ତାହା ପୁଣି ପରିବାର ସଦସ୍ୟଙ୍କ ସହିତ । ତାଙ୍କ ସହ ପତ୍ନୀ ନତାଶା ଏବଂ ଦୁଇ ଝିଅ ଆଜିନ୍ ଓ ଅନାଇଜା ମଧ୍ୟ ଅଛନ୍ତି । ସେ ସୋସିଆଲ୍ ମିଡିଆ ‘ଏକ୍ସ’ରେ ଫଟୋ ସେୟାର କରି ସୂଚନା ଦେଇଛନ୍ତି ।
ଆଇପିଏଲ୍ ଜାରି ରହିଥିବାରୁ ଭାରତୀୟ ଦଳର ଏବେ କୌଣସି କ୍ରୀଡ଼ାସୂଚୀ ନାହିଁ । ତେଣୁ ଗମ୍ଭୀର ସପରିବାର ସହ ଗତ ସପ୍ତାହ ୱେଷ୍ଟର୍ଣ୍ଣ ୟୁରୋପ୍ ଯାତ୍ରା କରିଥିଲେ । ପୂର୍ବତନ ମୁଖ୍ୟ କୋଚ୍ ରାହୁଲ ଦ୍ରାବିଡ଼ଙ୍କ ନେତୃତ୍ୱରେ ଭାରତ ଗତ ବର୍ଷ ଟି-ଟ୍ୱେଣ୍ଟି ବିଶ୍ୱକପ୍ ଚାମ୍ପିଅନ୍ ହୋଇଥିଲା । ବିଶ୍ୱକପ୍ ସହ ଦ୍ରାବିଡ଼ଙ୍କ କାର୍ଯ୍ୟକାଳ ଶେଷ ହୋଇଥିଲା ଏବଂ ବିସିସିଆଇ ଗମ୍ଭୀରଙ୍କୁ ମୁଖ୍ୟ କୋଚ୍ ନିଯୁକ୍ତ କରିଥିଲା । ଗମ୍ଭୀର କୋଚ୍ ଦାୟିତ୍ୱ ଗ୍ରହଣ କରିବା ପରେ ଭାରତ ଘରୋଇ ମାଟିରେ ନ୍ୟୁଜିଲାଣ୍ଡ ବିପକ୍ଷରେ ଟେଷ୍ଟ ସିରିଜ ଏବଂ ଅଷ୍ଟ୍ରେଲିଆ ଗସ୍ତରେ ବର୍ଡ଼ର-ଗାଭାସ୍କର ଟ୍ରଫି ଟେଷ୍ଟ ସିରିଜରେ ପରାଜିତ ହୋଇଥିଲା । ଯାହାକୁ ନେଇ ଗମ୍ଭୀରଙ୍କୁ କଡ଼ା ସମାଲୋଚିତ ହେବାକୁ ପଡ଼ିଥିଲା।
ମାତ୍ର ଚାମ୍ପିଅନ୍ସ ଟ୍ରଫିରେ ଭାରତ ଅପରାଜେୟ ରହିବା ସହ ତୃତୀୟ ଥର ଚାମ୍ପିଅନ୍ ହୋଇଥିଲା । ଫାଇନାଲ୍ରେ ଭାରତ ୪ ୱିକେଟ୍ରେ ନ୍ୟୁଜିଲାଣ୍ଡକୁ ପରାସ୍ତ କରିଥିଲା । ସୂଚନାଯୋଗ୍ୟ, ଭାରତ ଆଗାମୀ ଜୁନ ମାସରେ ଇଂଲଣ୍ଡ ଗସ୍ତ କରି ୫ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳିବ । ଏହାପରେ ଦଳ ବାଂଲାଦେଶ ଗସ୍ତ କରିବାକୁ ଥିବାବେଳେ ଘରୋଇ ମାଟିରେ ୱେଷ୍ଟଇଣ୍ଡିଜ୍ ଓ ଦକ୍ଷିଣ ଆଫ୍ରିକା ବିପକ୍ଷ ସିରିଜ ଖେଳିବ ।
